Quttyqtaý sózinde Berik Asylov keshenniń paıdalanýǵa berilýi Memleket basshysynyń aktıvterdi qaıtarý jónindegi tapsyrmasyn oryndaý nátıjesi ári Ádiletti Qazaqstan qurýǵa baǵyttalǵan júıeli saıasattyń bir bóligi ekenin atap ótti.
«Biz qaıtarylǵan aktıvterdiń maqsatty paıdalanylýyn qatań baqylaýda ustaımyz, árbir teńge Qazaqstannyń damýyna qyzmet etýi tıis. Bul sharalardyń barlyǵy «Zań men tártip» ıdeologııasyna saı keledi jáne qoǵam ıgiligi úshin jumys istep, sportty damytýǵa, jastardy «Adal azamat» tujyrymdamasy rýhynda tárbıeleýge jaǵdaı jasaıdy», dep atap ótti Berik Asylov.
Aqmola oblysynyń ákimi bul sport nysany jaı ǵana sport kesheni emes, ulttyń bolashaǵyna, balalar men jastardyń densaýlyǵy men damýyna salynǵan ınvestısııa ekenin aıtty.
«Prezıdent Qasym-Jomart Toqaev óz sózinde buqaralyq sportsyz deni saý urpaq tárbıeleý múmkin emestigin atap ótken bolatyn. Sondyqtan sportty damytý, jastardy qoldaý jáne salaýatty ómir salty mádenıetin qalyptastyrý – basty basymdyqtardyń biri. «Kokshe Arena» – kásibı sport pen buqaralyq dene shynyqtyrýdy biriktiretin jańa múmkindikter keńistigi. Keshen barlyq zamanaýı talaptardy eskere otyryp salynǵan jáne halyqaralyq standarttarǵa tolyq saı», dedi Marat Ahmetjanov.
Keshen quramynda zamanaýı mýltımedııalyq júıelermen jabdyqtalǵan 650 oryndyq zal, skalodromy men órt-qutqarý qoldanbaly sport túrlerine arnalǵan munarasy bar ámbebap sport zaly, sondaı-aq boks, kúres, aýyr atletıka jáne krossfıt zaldary bar. Barlyq jabdyqtar olımpıadalyq standarttarǵa saı sertıfıkattalǵan. Sonymen qatar, múmkindigi shekteýli azamattarǵa arnalǵan arnaıy jabdyqtar da qarastyrylǵan. Ǵımarattyń eń joǵarǵy syıymdylyǵy – shamamen 1000 adam.
Keshenge irgeles aýmaqta jeńil atletıka aımaǵy, oıyn sport túrlerine jáne laqtyrý jattyǵýlaryna arnalǵan alańdar, sondaı-aq demalys aımaqtary men abattandyrylǵan jaıaý júrginshiler keńistigi ornalasqan.
Ashylý aıasynda sport kesheninde Astana men Shymkent qalalarynan, Soltústik Qazaqstan, Pavlodar, Qostanaı, Qaraǵandy oblystarynan kelgen belsendi uzaq ómir súrý ortalyqtarynyń ókilderi, sondaı-aq bıyl halyqaralyq jarystarda júldeli oryn alǵan aqmolalyq sportshylar marapattaldy.
«Kokshe Arena» sport kesheni óńirdiń sport ınfraqurylymyndaǵy mańyzdy nysanǵa aınalyp, jattyǵýlar, buqaralyq is-sharalar men halyqaralyq deńgeıdegi jarystar ótkizýge barlyq jaǵdaı jasaıdy.
Aıta keteıik, bul sport kesheni – óńirde qaıtarylǵan aktıvter esebinen salynǵan ekinshi sport ınfraqurylym nysany. Buǵan deıin oblysta Zerendi aýylynda balalar men jasóspirimderge arnalǵan sport mektebi ashylǵan bolatyn. Jalpy arnaıy memlekettik qor qarajaty esebinen Aqmola oblysynda 42 áleýmettik nysan salý josparlanǵan, onyń ishinde 14 densaýlyq saqtaý mekemesi, 26 sý jabdyqtaý nysany jáne 2 sport mekemesi bar.
